પ્રયાગરાજ: ઉત્તર પ્રદેશના પ્રયાગરાજમાં યોજાનાર મહાકુંભમાં આતંકવાદી હુમલાની ધમકી આપનારા ઈન્સ્ટાગ્રામ અને X યુઝર સામે પોલીસે કેસ નોંધી લીધો છે. બીજી તરફ સર્ચ ઓપરેશન દરમિયાન એક રશિયન નાગરિકની ધરપકડ કરવામાં આવી છે. જેમના વિઝાની મુદત પૂરી થઈ ગઈ છે. હાલ પૂછપરછ બાદ પોલીસે તેને દિલ્હીના ઈમિગ્રેશન બ્યુરોને સોંપી દીધો છે.
આતંકવાદી હુમલાની ધમકીને ઈન્ચાર્જ દેવેન્દ્ર કુમાર શર્માની ફરિયાદ પર મેળા ક્ષેત્રમાં સ્થિત કોતવાલી પોલીસ સ્ટેશનમાં FIR નોંધવામાં આવી છે. હાલ પોલીસની સાથે સાયબર સેલની ટીમ પણ તહેનાત કરવામાં આવી છે. પોલીસ તેના આઈપી એડ્રેસને ટ્રેસ કરી રહી છે. જેમાં આઈટી એક્ટની સાથે અન્ય કલમો પણ લગાવવામાં આવી છે. બીજી તરફ આરોપી ઈન્સ્ટાગ્રામ યુઝરે પોતાના એકાઉન્ટમાંથી મહાકુંભને લઈને ધમકી સાથે જોડાયેલી પોસ્ટ પણ ડિલીટ કરી દીધી છે.
એક હજાર લોકોને મારી નાખવાની ધમકી આપી હતી
આરોપીએ ધમકી આપતા કહ્યું છે કે, 13 જાન્યુઆરીના રોજ ધાર્મિક સભા દરમિયાન બ્લાસ્ટમાં ઓછામાં ઓછા એક હજાર લોકો માર્યા જશે. આ સમાચાર બાદ મેળાની અંદર પોલીસ સંપૂર્ણ રીતે સક્રિય થઈ ગઈ છે અને મેળા વિસ્તારમાં વિવિધ સ્થળોએ પોલીસ ચેકિંગ ઓપરેશન પણ ચાલી રહ્યું છે. પોલીસ મેળા વિસ્તારમાં પ્રવેશતા વાહનોનું ચેકિંગ કરી રહી છે અને તેમના જરૂરી દસ્તાવેજોની ચકાસણી કરી રહી છે.
મહાકુંભ મેળામાં એક રશિયન યુવક ગેરકાયદેસર રીતે રોકાયો હતો. પોલીસે જ્યારે ઓપરેશન ચલાવ્યું ત્યારે એક રશિયન નાગરિક પણ ઝડપાયો હતો. તેના વિઝાની મુદત પૂરી થઈ ગયા પછી પણ તે મેળામાં રોકાયો હતો. તેણે સેક્ટર નંબર 15 સ્થિત ભક્ત શિબિરમાં આશ્રય બનાવ્યો હતો. મેળા પોલીસ દ્વારા પૂછપરછ બાદ હવે તેને દિલ્હીના ઈમિગ્રેશન બ્યુરોને સોંપવામાં આવ્યો છે. મેળા વિસ્તારમાં તેને શંકાસ્પદ જણાતાં પોલીસ કર્મચારીઓએ તેની પૂછપરછ કરતાં તે ગભરાઈ ગયો હતો.
જાણકારી મળતા જ સ્થાનિક ગુપ્તચર એજન્સીના અધિકારીઓ પણ પહોંચી ગયા હતા અને તેની પૂછપરછ કરી હતી. તપાસ દરમિયાન રશિયન નાગરિકે પોતાનું નામ આન્દ્રે પોફકોફ જાહેર કર્યું અને પોતે રશિયાનો નાગરિક હોવાનું જણાવ્યું હતું. દસ્તાવેજોની તપાસમાં જાણવા મળ્યું કે સપ્ટેમ્બર મહિનામાં જ તેના વિઝાની મુદત પૂરી થઈ ગઈ હતી. તેઓ છેલ્લા 15 દિવસથી મેળાના સેક્ટર નંબર 15માં રોકાયા હતા.
