અમદાવાદ મર્ડર મીસ્ટ્રીઃ 34 વર્ષ પહેલા થયેલી યુવતીની હત્યા, ક્રાઈમ બ્રાન્ચે કર્યો સનસનાટી ભર્યો ખુલાસો

અમદાવાદના વટવા વિસ્તારમાં 34 વર્ષ પહેલાં એક યુવતીની રહસ્યમય હત્યા અંગે ક્રાઈમ બ્રાન્ચે એક સનસનાટીભર્યો ખુલાસો કર્યો છે. 1992માં ગુમ થયેલી ફરઝાનાના કેસમાં હવે એક ચોંકાવનારું સત્ય બહાર આવ્યું છે. ક્રાઈમ બ્રાન્ચે એક જૂના, ત્યજી દેવાયેલા ઘરની નીચે આશરે 20 ફૂટ દટાયેલા માનવ અવશેષો શોધી કાઢ્યા છે, જેને ડીએનએ પરીક્ષણ માટે મોકલવામાં આવ્યા છે.

આ કેસ 1992નો છે, જ્યારે ધોળકાની રહેવાસી ફરઝાના અચાનક ગાયબ થઈ ગઈ હતી. તેના લગ્ન સુરતમાં થયા હતા પરંતુ લગ્નના એક વર્ષ પછી જ છૂટાછેડા થઈ ગયા હતા. છૂટાછેડા પછી, ફરઝાના ધોળકામાં તેના માતાપિતાના ઘરે પાછી ફરી અને બાદમાં અમદાવાદ રહેવા ગઈ હતી. અમદાવાદમાં તે શમસુદ્દીન ખેડાવાલા નામના એક વ્યક્તિને મળી હતી. બંને વચ્ચે પ્રેમ સંબંધ થયો અને તે લગ્નમાં ફેરવાયો હતો

અમદાવાદ ક્રાઈમ બ્રાન્ચ દ્વારા કરવામાં આવેલી તપાસમાં ખુલાસો થયો કે ફરઝાના લગ્ન પછી પણ વેશ્યાવૃત્તિમાં સામેલ હતી અને તેના ઘણા પુરુષો સાથે સંબંધો હતા. આના કારણે તેના પતિ શમસુદ્દીન અને ફરઝાના વચ્ચે વારંવાર ઝઘડા થતા હતા. એવું કહેવાય છે કે ગુસ્સે ભરાયેલા શમસુદ્દીને ફરઝાનાની હત્યાનું કાવતરું ઘડ્યું હતું.

તેનો ભાઈ ઇકબાલ ખેડાવાલા, મિત્ર અબ્દુલ કરીમ જાવરાવાલા અને મકાનમાલિક સાદિયા બીબી આ કાવતરામાં સામેલ હતા. ચારેય આરોપીઓએ ફરઝાનાની હત્યા કરવાની યોજના ઘડી હતી અને તેને રાત રોકાવાના બહાને સાદિયા બીબીના ઘરે લઈ ગયા હતા. રાત્રે, ચારેય આરોપીઓએ ફરઝાનાનું ગળું દબાવીને હત્યા કરી હતી.

હત્યા પહેલા ઘરની બહાર એક ઊંડો ખાડો ખોદવામાં આવ્યો હતો. હત્યા પછી, ફરઝાનાના મૃતદેહને તે જ ખાડામાં દાટી દેવામાં આવ્યો હતો અને શંકા ટાળવા માટે તેને માળખાથી ઢાંકી દેવામાં આવ્યો હતો. સાદિયા બીબીના એક સંબંધીએ આ ઘટના જોઈ હતી, પરંતુ આરોપીઓએ તેને જાનથી મારી નાખવાની ધમકી આપીને ચૂપ કરી દીધી હતી.

ક્રાઇમ બ્રાન્ચને તાજેતરમાં જ બાતમી મળી હતી કે 1992 માં કુતુબનગર વિસ્તારમાં એક મહિલાની હત્યા કરીને દફનાવી દેવામાં આવી હતી. માહિતીના આધારે, પોલીસે બંધ ઘરની તપાસ શરૂ કરી હતી. તપાસમાં જાણવા મળ્યું કે આ ઘર છેલ્લા પાંચથી સાત વર્ષથી બંધ હતું, અને વિસ્તારમાં અફવાઓ ફેલાઈ રહી હતી કે આ ઘર ભૂતિયા છે.

પોલીસે જ્યારે ઘર ખોદ્યું ત્યારે જમીનથી લગભગ 20 ફૂટ નીચે માનવ અવશેષો મળી આવ્યા હતા. અવશેષો અમદાવાદ સિવિલ હોસ્પિટલમાં મોકલવામાં આવ્યા છે. ફરઝાનાના જીવિત ભાઈ સાથે ડીએનએ મેચ કરવાથી તેની ઓળખની પુષ્ટિ થશે. એફએસએલ રિપોર્ટ આવ્યા બાદ આગળની કાનૂની કાર્યવાહી કરવામાં આવશે.